Psalms 85
Yave weti kutuvangila mamboti
Nkunga bana ba Kole kuidi pfumu minyimbidi.
1Wumonisa nlemvo kuidi ntoto aku ; a Yave,wuvutula kiuka ki Yakobi.
2Wulemvukila mambimbi ma batu baku ;
ayi wufuka masumu mawu moso.
3Wutula miangu miaku mioso va ndambu
ayi wuvutikisa ntima mu nganzi aku.
4Wutuvutula banga bo tutuama bela, a Nzambi Mvulusi eto,
wutumoni diaka khini.
5Mawuba mu nganzi kuidi beto mu zithangu zioso e ?
Mawulambisa nganzi aku tsungi ka tsungi e ?
6Wukadi buela tuvutudila luzingu
muingi batu baku bamona khini mu ngeyo e ?
7Wutumonisa luzolo luaku lu ngolo, a Yave,
ayi wutuvani phulusu aku.
8Ndiela wa momo, Nzambi Yave kela tuba ;
veni zitsila zi ndembama kuidi batu bandi,
kuidi banlongo bandi
vayi buna babika vutukila kilawu.
9Kiedika, phulusu andi yifikimini
babo beti kunkinzikanga
mu diambu di nkembo andi wuzingila mu ntoto eto.
10Luzolo ayi kikhuikizi bidengini ;
busonga ayi ndembama bibumbisini.
11Kikhuikizi kitotukidi va ntoto
ayi busonga buntala ku tsi tona ku diyilu.
12Buna Yave mamvandi wela vana biobio bidi bimboti
ayi ntoto eto wela buta mimbutu miandi.
13Busonga buela kuntuaminina ku ntuala
ayi buela kubika nzila mu diambu di bitambi biandi.
Copyright information for
YomNWM